Frá CCP. CCP tilkynnti nýlega um útgáfu stærstu viðbótar fyrr og síðar, við tölvuleikinn EVE Online. EVE Online er netspilunarleikur með vísindaskáldsöguívafi sem gerist í fjarlægri framtíð og er hann spilaður af 240.000 spilurum víða um heim. EVE Online er best lýst sem stórum heimi þar sem barist er á banaspjótum um yfirráð yfir svæðum, auðlindum og mörkuðum.
Netspilunarleikir eru ólíkir hefðbundnum leikjum að því leyti að þeir eru stöðugt í þróun eftir útgáfu, og er EVE Online sannarlega engin undantekning á þeirri reglu. Sú hefð hefur skapast að tvær stórar viðbætur við leikinn komi út á hverju ári með nýjum og spennandi spilunarmöguleikum fyrir notendur. Í kjölfar óljósra aðstæðna á markaði tók CCP þá ákvörðun að spýta í lófana svo um munar og ráðast í sitt metnaðarfyllsta verkefni hingað til.
„Sumarútgáfan“, eins og hún er kölluð enn sem komið er, mun innihalda byltingarkenndar nýjungar í geimskipasmíði, bardagatækni og könnun á áður óþekktum leyndardómum himinheimsins. Fjölmörgum þaulreyndum lykilstarfsmönnum hefur verið kippt úr hinum ýmsu framtíðarverkefnum sem ekki tengjast EVE Online á beinan hátt og þeir settir í að framleiða ný ævintýri fyrir spilara EVE á methraða. Aldrei hafa fleiri starfsmenn starfað við EVE Online en þessa dagana.
Stefnt er á útgáfu Sumarútgáfunnar snemma í vor, í takt við þá miklu bjartsýni og kraft sem einkennir CCP þessa dagana.